პაციენტს აქვს უფლება, იცოდეს მისი დაავადების მკურნალობის ყველა არსებული მეთოდის შესახებ, მათ შორის ისეთი მედიკამენტების თაობაზე, რომლებიც საქართველოში არაა რეგისტრირებული, თუმცა დამტკიცებულია ევროპისა თუ ამერიკის მარეგულირებლების მიერ.ამის შესახებ კლინიკურმა ონკოლოგმა, მედიცინის დოქტორმა, “ჯეო ჰოსპიტალსის თბილისის მრავალპროფილური სამედიცინო ცენტრის” ონკოლოგიური მიმართულების ხელმძღვანელმა ნინო ფიფიამ რადიოგადაცემაში „ჯანმრთელობის ლაბორატორია“ საუბრისას განაცხადა. საკითხს ონკოლოგი წამყვანის შეკითხვაზე პასუხისას შეეხო, რომელიც ჯანდაცვის ყოფილი მინისტრის განცხადებას ეხებოდა. ამ განცხადების თანახმად, 60 ონკოლოგის მიერ გამოწერილი ფორმა 100-ის საფუძველზე მილიონობით ლარის დაფინანსების მოთხოვნა შედიოდა როგორც სამინისტროში ასევე მუნიციპალიტეტებში, ხოლო ონკოლოგიური პაციენტებისთვის ხდებოდა გაურკვეველი წარმოშობის წამლის გამოწერა და გამოყენება. ამ საკითხის შესაბამისი შუალედური განხილვა უკვე შედგა პროფესიულ საბჭოზე და საქმის მასალები სამართალდამცავ სტრუქტურებშიც გადაიგზავნა.ნინო ფიფიას განმარტებით, არსებობს ახალი თაობის მედიკამენტები, რომელთა ეფექტიანობა დადასტურებულია, თუმცა მათ დარეგისტრირებას გარკვეული დრო სჭირდება. ამ დროში კი პაციენტს უნდა ჰქონდეს შესაბამისი ინფორმაცია მკურნალობის სხვადასხვა შესაძლებლობის შესახებ. „მაგალითად ავიღოთ თარგეტული, ანუ სამიზნე თერაპია, რომელიც მიმართულია კონკრეტული ცილის ან გენეტიკური მუტაციის დათრგუნვისკენ, რომელიც იყო წამყვანი კონკრეტული ონკოპათოლოგიის განვითარებაში. არის სხვადასხვა თაობის პრეპარატები, მაგალითად, ძუძუს კიბო რომ ავიღოთ, ჰერ2-დადებითი კიბოს შემთხვევაში, არის პირველი და მეორე თაობის მედიკამენტები, რომლებიც, საბედნიეროდ, ხელმისაწვდომია ჩვენს ქვეყანაში. მესამე თაობა ასევე ხელმისაწვდომია. არის ასევე მეოთხე თაობა, რომელიც ჯერჯერობით არ არის ხელმისაწვდომი, მაგრამ რამდენადაც მე ვარ ინფორმირებული, მალე ეს პრეპარატიც იქნება საქართველოში. ანუ დადებითი ძვრები ყველა მიმართულებით არის და ჩვენი ექიმები - მათ შორის მეც - გულწრფელად ვაწვდით ინფორმაციას ჩვენს პაციენტებს, რა შეგვიძლია, რა არის მოწოდებული თუნდაც საერთაშორისო სტანდარტებით, შეგვიძლია თუ არა სრული უზრუნველყოფა და თუ კონკრეტულ სიტუაციაში არ შეგვიძლია მისი გამოყენება იმის გამო, რომ ჯერ პრეპარატი არ დარეგისტრირებულა, ეს უნდა იყოს განხილული პაციენტთან ერთად. ამის შემდეგ პაციენტი გადაწყვეტს, საზღვარგარეთ შეძენით გადაჭრას ეს პრობლემა თუ დალოდებით, რომ მალე ჩვენთანაც იქნება,“ - განაცხადა ფიფიამ და აღნიშნა, რომ ასეთი პრეპარატების ნაწილი საქართველოს ბაზარზეც ხელმისაწვდომია.მისი თქმით, ექიმები პაციენტებს სთავაზობენ იმას, რაც არის ბოლო სიტყვა ონკოლოგიაში, რაც სჭირდება უშუალოდ ამ პაციენტის კონკრეტულ ონკოლოგიას. ხოლო თუ ამწუთას საქართველო ვერ უზრუნველყოფს ამ პრეპარატზე წვდომას, პაციენტს უნდა ჰქონდეს არჩევანი, აქ შეიძენს მას თუ წავ და უცხოეთში ჩაიტარებს მკურნალობას. იგივე ეხება ომუნოთერაპიას, რომლის ერთ-ერთი პრეპარატი საქართველოში რეგისტრირებულია და ფილტვის და ღვიძლის კიბოს მკურნალობაში გამოიყენება, მაგრამ არსებობს სხვა სიმსივნეები - მაგალითად კანის კიბო, რომლის სამკურნალო იმუნოთერაპიის პრეპარატები დღესდღეისობით საქართველოში არ არის რეგისტრირებული, თუმცა ამერიკაშიც და ევროპაშიც ხელმისაწვდომია. ონკოლოგის თქმით, ამ ტიპის ინფორმაცია უნდა მიეწოდოს პაციენტს. „რთულია აქ ისაუბრო იმაზე, რომ ექიმებს თურმე ჰქონიათ პირადი ინტეტესები. აქ ყველანი გამოვდივართ პაციენტის ინტერესებიდან, რომ შევთავაზოთ პერსონალიზებული მკურნალობა, რათა შედეგები უკეთესი იყოს და კარგი ხარისხით იცხოვროს ადამიანმა,“ - განაცხადა ფიფიამ.
მიმდინარე წლის მარტის მონაცემებით, ძირითად იმპორტირებულ ფარმაცევტულ პროდუქტებსა და პრეპარატებზე, წინა წლის იგივე თვესთან შედარებით ფასები 3,3 პროცენტით გაიზარდა. წინა თვესთან შედარებით კი ზრდამ 0,8% შეადგინა. მონაცემებს საქსტატი ავრცელებს. მისი ინფორმაციით, მთელი 2022 წლის განმავლობაში, აღნიშნულ ჯგუფში ფასები, წინა წლის იგივე თვესთან შედარებით მცირდებოდა, 2002 წლის მარტში 15%-იანი შემცირებაც კი დაფიქსირდა. შემცირების ტრენდი გრძელდებოდა 2023 წლის განმავლობაში, თუმცა შედარებით მცირე მასშტაბით.რაც შეეხება ფასების ცვლილებას წინა თვესთან შედარებით, როგორც აღინიშნა, აქ ზრდა 0,8%-იანი იყო, თებერვალში დაახლოებით 5%-იანი კლება დაფიქსირდა, იანვარში კი 5%-იანი ზრდა.შეგახსენებთ, რომ 2022 წლის იანვარში საქართველოსთვის თურქეთის ფარმაცევტული ბაზარი გაიხსნა. შედეგად, მედიკამენტების ფასები ამ სეგმენტში 70-80%-ით შემცირდა.
სადაზღვევო ინდუსტრიის წმინდა მოგების გაზრდის მიუხედავად, დადებითი ეფექტი რეალურად უმნიშვნელოა,რადგან ქვეყნის სადაზღვევო ბაზარზე დაბალი მოცვაა - ასე აფასებს „ბიზნესპარტნიორთან“ სადაზღვევო ასოციაციის პრეზიდენტი დევი ხეჩინაშვილი დაზღვევის ზედამხედველობის სამსახურის მიერ გამოქვეყნებულ 2023 წლის მაჩვენებლებს.როგორც ცნობილია, 2023 წელს სადაზღვევო კომპანიების წმინდა მოგება ₾34.5 მლნ-ით გაიზარდა და 73.5 მილიონი ლარი შეადგინა.სადაზღვევო ასოციაციის პრეზიდენტის შეფასებით, 2023 წლისთვის პანდემიური გამოწვევები სრულად დაძლეულია და კომპანიები პორტფელებს უკეთესად მართავენ, რაც მოგების მაჩვენებლებზეც ადეკვატურად აისახა. ამასთან, ხეჩინაშვილი აცხადებს, რომ შედეგით უკმაყოფილოა."მთელი სადაზღვევო ინდუსტრიისთვის 73.5 მლნ ლარიანი წმინდა მოგება დიდად არაფერს ნიშნავს, როცა 18 კომპანიაზეა საუბარი. ციფრი ჩანს, რომ გაიზარდა, რადგან გასულ წლებში იყო მცირე მოგება და ასე გამოჩნდა. ამ დროს სექტორში უზარმაზარი აქტივებია ჩადებული. არასტაბილურობა იყო ბაზარზე, რაც თანდათან მოწესრიგდა და გარკვეულ შედეგამდე გავიდნენ, ცხადია, ეს საკმარისი არ არის, მაგრამ განვითარების შესაძლებლობას იძლევა და ამ მხრივ სტატისტიკა დადებითია.ამასთან, ყველაზე კრიტიკული მიმართულება არის ჯანდაცვა, ვინაიდან მასობრივი პროდუქტია და ყველაზე პატარა მარჟები ამ სეგმენტშია. აქაც აშკარად დასტაბილურდა სიტუაცია, ამის მაგალითია ისიც, რომ სუფთა მოგებას აღწევს კომპანია, მაგალითად, "იმედი L", რომელიც მხოლოდ ამ სფეროშია წარმოდგენილი. გარდა ამისა, ტარიფების მართვა მოხდა ბაზარზე. მედიკამენტებზე რეფერენტული ფასები ამ მხრივ რაღაც შედეგს იძლევა, კომპანიების დანახარჯზე დადებითი ეფექტი აქვს. ამ ყველაფრის მიუხედავად, წმინდა მოგების სტატისტიკა დამაკმაყოფილებელი ნამდვილად არ არის, როცა მოცვა არის ძალიან მცირე. ვიტყოდი, რომ ეს იყო ბუნებრივი პროცესი, რასაც კომპანიებმა დამატებითი ხელშეწყობის გარეშე მიაღწიეს“, - აცხადებს დევი ხეჩინაშვილი.მისი განმარტებით, სამედიცინო დაზღვევაში 720 944 ადამიანის ჩართვა შეიძლება ძალიან კარგია, მაგრამ სამაგიეროდ დანარჩენ მიმართულებებში ჩავარდნაა. მაგალითად, ავტოდაზღვევაში, სადაც მეათედიც აღარ არის მოცვა - 1.7 მლნ ავტომობილიდან 126 065 დაზღვეული."გამოწვევაა, რომ მოცვა იზრდება ნელა და ეს ტრადიციულად ცნობილია. რა ზრდის მოცვას და რა ზრდის კულტურას, რომ მეტი ხალხი შედის სადაზღვევო ურთიერთობებში, ნახონ სიკეთე, სტაბილურობა, კარგი სერვისი. ამის ყველაზე კარგი ინსტრუმენტი უკლებლივ ყველა ქვეყანაში სავალდებულო დაზღვევის არსებობაა, რომელიც ჩვენთან არ არის,"-აცხადებს ხეჩინაშვილი.მისი შეფასებით, ის მექანიზმები, რაც მთელ მსოფლიოში აპრობირებულია, მათ შორის, სავალდებულო დაზღვევა, საქართველოში არ არის გამოყენებული.ცნობისთვის, სახელმწიფო ზედამხედველობის სამსახურის ინფორმაციით, 2023 წელს სადაზღვევო ინდუსტრიის წმინდა მოგებამ 73,5 მილიონი ლარი შეადგინა. 2022 წლის ანალოგიურ პერიოდში ეს მაჩვენებელი 39 მლნ ლარი იყო. 2023 წლის განმავლობაში მოზიდულმა სადაზღვევო პრემიამ პირდაპირი დაზღვევის საქმიანობიდან 1 063,6 მილიონი ლარი შეადგინა.bp.ge
სახელმწიფო აგრძელებს მოლაპარაკებებს უცხოურ ფარმაცევტულ მწარმოებლებთან ინოვაციური ონკოლოგიური მედიკამენტების პირდაპირი გზით შესყიდვის მიზნით. ამ კომპანიებს შორისაა შვედურ-ბრიტანული „ასტრაზენეკა“ და სხვა არაერთი მწარმოებელი. ამის შესახებ დღეს ჯანდაცვის მინისტრის მოადგილემ თამარ გაბუნიამ განაცხადა.„მედიკამენტები, რომლებიც დღეს პროგრამულად ფინანსდება, 90-მდე მოლეკულაა. ამ 90 მოლეკულიდან არის ინოვაციური მედიკამენტები, რისი შესყიდვაც სახელმწიფომ გადაწყვიტა ცენტრალიზებული მექანიზმით, რადგან აქ იყო უკეთესი პირობები და უფრო მეტი მედიკამენტის მიღების შესაძლებლობა იგივე ხარჯით. ჯერჯერობით ეს მოლაპარაკება შედგა „როშესთან“ და „ნოვარტისთან“ და ეს მედიკამენტებია 21-მდე მოლეკულა, რომლებსაც სახელმწიფო ცენტრალიზებულად ყიდულობს. ეს პროცესი სხვა დანარჩენ ინოვაციურ მედიკამენტებთან მიმართულებითაც გაგრძელდება. ეს არ არის მხოლოდ „ასტრაზენეკა“, ბევრი სხვა კომპანიაა, რომელიც გვთავაზობს ინოვაციურ მედიკამენტებს და ჩვენი მიზანიც ისაა, რომ გეგმაზომიერად ინოვაციური მედიკამენტები ჩვენს ქვეყანაში დაინერგოს, რომ ჩვენ პაციენტებს ჰქონდეთ წვდომა იმ მკურნალობაზე, რაც შედეგიანია,“- განაცხადა გაბუნიამ. შეგახსენებთ: ჯანდაცვის სამინისტრომ მაღალხარისხიან მედიკამენტებზე ხელმისაწვდომობის უზრუნველყოფის მიზნით, ინოვაციური ონკოლოგიური ფარმაცევტული პროდუქტის შესყიდვა გასულ წელს, მინისტრ ზურაბ აზარაშვილის პერიოდში დაიწყო. ბოლო კონტრაქტი ამ მიმართულებით 2023 წლის სექტემბერში, მსოფლიოს წამყვან ფარმაცევტულ კომპანია „ნოვარტისთან“ გაფორმდა. შედეგად, 2024 წელს, პაციენტები, 8 დასახელების სხვადასხვა მედიკამენტს, საყოველთაო ჯანმრთელობის დაცვის სახელმწიფო პროგრამის ფარგლებში მიიღებენ. ეს მედიკამენტებია: „კისქალი“, „ჯაკავი“, „მეკინისტი“, „ტაფინლარი“, „ვოტრიენტი“, „აფინიტორი“, „ზომეტა“, „ფემარა“.შვეიცარიულ „როშესთან“ კი სამინისტრომ ხელშეკრულება 2023 წლის ნოემბერში გააფორმა და ის 13 მედიკამენტს შეეხო.
ორსულთა მეთვალყურეობაში ჩართული 370 კლინიკიდან სტანდარტები მხოლოდ 170-მა დააკმაყოფილა
„ეს ზიანს მიაყენებს მოსახლეობის ჯანმრთელობას“ - თამბაქოსთან დაკავშირებული ცვლილებები პირველი მოსმენით დამტკიცდა
სასტუმრო "ზებო" ტურისტებს აპითერაპიას შესთავაზებს
"კერძო დაზღვევის მქონე ადამიანების წილმა 19%-იან ბარიერს ვერ გადააჭარბა"
„ვითარება საგრძნობლად შეიცვალა“ - დავით ონოფრიშვილი სამოგზაურო დაზღვევის პირობების ცვლილებაზე
