მთავარი » ჯანდაცვა » საყოველთაო ჯანდაცვა » 7 ლარი ექიმებისთვის და 4,4 ლარი ექთნებისთვის – მინიმალური საათობრივი ანაზღაურების მოცულობა ცნობილია

7 ლარი ექიმებისთვის და 4,4 ლარი ექთნებისთვის – მინიმალური საათობრივი ანაზღაურების მოცულობა ცნობილია

2023 წლიდან პირველი იანვრიდან, ექიმებისა და ექთნების მინიმალური საათობრივი ანაზღაურება დაწესდება. ინფორმაციას ჯანდაცვის სამინისტრო ავრცელებს. უწყების ცნობით, 2023 წლის პირველი იანვრიდან, ექიმების მინიმალური ანაზღაურება საათში 7 ლარით (თვეში საშუალოდ 1260 ლარი), ექთნების კი საათში 4.4 ლარით (თვეში საშუალოდ 792ლარი) განისაზღვრება.

სამედიცინო სექტორში დასაქმებული პირების შრომითი ანაზღაურების მინიმალური ზღვრის დაწესდება ჯანდაცვის მინისტრმა ზურაბ აზარაშვილმა 2022 წლის დასაწყისში დააანონსა. რეფორმის მიხედვით, მომავალი წლიდან, საყოველთაო ჯანმრთელობის დაცვის სახელმწიფო პროგრამაში ჩართული ყველა კლინიკის ხელმძღვანელობა, ვალდებული იქნება, ექიმებისა და ექთნების სახელფასო ანაზღაურება, ჯანდაცვის სამინისტროს მიერ წარმოდგენილი მინიმალური ზღვრის გათვალისწინებით დაადგინოს. ახალი რეგულაციით, ხელფასის ზრდა შეეხება 9000-მდე ექიმსა და 8000-ზე მეტ ექთანს.

 

„აღნიშნული გადაწყვეტილება მნიშვნელოვნად შეუწყობს ხელს დასაქმებულის მოტივაციისა და პროდუქტიულობის გაზრდას. ასევე, გააუმჯობესებს დასაქმებულთა სამუშაო პირობებსა და სამედიცინო მომსახურების ხარისხს.

შრომითი ანაზღაურების მინიმალური ზღვრის დადგენის მიზნით, ჯანდაცვის სამინისტრომ, საერთაშორისო გამოცდილება შეისწავლა. ასევე, გაეცნო საქართველოში მოქმედ სხვადასხვა კერძო კლინიკებში არსებულ პრაქტიკას, რომლის მიხედვითაც ექიმის ხელფასი საათში 5,5 ლარიდან 6,2 ლარამდე მერყეობს. ექთნის და სხვა სამედიცინო პერსონალის მინიმალური ხელფასის ოდენობა კი ექიმის შრომითი ანაზღაურების გათვალისწინებით, სხვადასხვა პროცენტით არის განსაზღვრული.

საზოგადოებისთვის ცნობილია, რომ ჯანდაცვის მინისტრის გადაწყვეტილებით, შრომის მინიმალური საათობრივი ანაზღაურების პრაქტიკა პირველი აგვისტოდან უკვე მოქმედებს დიდ სახელმწიფო კლინიკებში – თბილისის, ბათუმისა და რუხის რესპუბლიკურ საავადმყოფოებსა და ქუთაისის ო. ჩხობაძის მრავალპროფილურ ცენტრში, სადაც დასაქმებული მედპერსონალისთვის, არსებული მინიმალური სახელფასო ანაზღაურება, დაახლოებით, 30%-ით გაიზარდა.

ჯანდაცვის სამინისტროს ერთ-ერთი პრიორიტეტი სამედიცინო სექტორში თითოეული დასაქმებულის ინტერესების დაკმაყოფილება, მათთვის ღირსეული ანაზღაურებისა და სამუშაო პირობების შექმნაა. ამ მიმართულებით, ჯანდაცვის სამინისტრო აგრძელებს აქტიურ მუშაობს. უწყების გადაწყვეტილებით, ექიმებისა და ექთნების სახელფასო ანაზღაურების მინიმალური ზღვარი, მომდევნო წლებში, ეტაპობრივად, გაიზრდება. 2025 წლისთვის, ექიმის მინიმალური ანაზღაურება საათში – 9 ლარი , ექთნის კი 5.6 ლარი გახდება.

აღსანიშნავია, რომ ბოლო წლებში, ბევრმა ქვეყანამ, დაბალი ანაზღაურების აღმოფხვრისა და ღირსეული გამომუშავების პოლიტიკის გატარების მიზნით, განამტკიცა არსებული, ან შემოიღო მინიმალური სახელფასო ანაზღაურების პრაქტიკა. მინიმალურ სახელფასო ანაზღაურებაზე შეთანხმებულია გაეროს წევრი ქვეყნების 90%,“ – ნათქვამია ჯანდაცვის სამინისტროს მიერ გავრცელებულ რელიზში.

იხილეთ ასევე

ინფექციის კონტროლის კუთხით გამოვლენილი დარღვევების გამო, 59 სამედიცინო დაწესებულება 253 000 ლარით დაჯარიმდა

მიმდინარე წელს, შიდა ინფექციებზე 91 სამედიცინო დაწესებულება შემოწმდა, საიდანაც ინფექციის კონტროლის კუთხით გამოვლენილი დარღვევების გამო 59 …