მთავარი » ახალი ამბები » ჯანდაცვის მინისტრი: კვლავ ხდება პაციენტებისთვის თანხების მოთხოვნა გაუგებარი მიზეზებით

ჯანდაცვის მინისტრი: კვლავ ხდება პაციენტებისთვის თანხების მოთხოვნა გაუგებარი მიზეზებით

დადგენილი ტარიფების ფარგლების ზევით, კვლავ ხდება პაციენტებისთვის თანხების მოთხოვნა სრულიად გაუგებარი მიზეზებით. ამის შესახებ ჯანდაცვის მინისტრმა პარლამენტში გამოსვლისას განაცხადა. მისი თქმით, მსგავს პრეცედენტებზე სამინისტრომ არაერთხელ გასცა გაფრთხილება, რომლის გაუთვალისწინებლობის შემთხვევაში უწყებას სათანადო ორგანოებისადმი მიმართვა მოუწევს, რათა ეს საქმეები გამოიძიონ.

„ჩვენ გასული წლიდან დავიწყეთ სამედიცინო მომსახურებების ერთიან სატარიფო პოლიტიკაზე მუშაობა. აღნიშნული მიდგომის მნიშვნელოვანი შედეგები ჩვენ უკვე მკაფიოდ დავინახეთ კარდიოქირურგიის მაგალითზე: დადგენილი ოპტიმალური ტარიფების ფარგლებში მნიშვნელოვნად შემცირდა პაციენტების ჯიბიდან გადასახადი. თუმცა, ჩვენ ვფლობთ ინფორმაციას, რომ სამწუხაროდ კვლავ აქვს ადგილი პაციენტების მიმართ არაკეთილსინდისიერ დამოკიდებულებას. დადგენილი ტარიფების ფარგლების ზევით, კვლავ ხდება პაციენტებისთვის თანხების მოთხოვნა სრულიად გაუგებარი მიზეზებით. მსგავს პრეცედენტებზე ჩვენ არაერთხელ გავეცით გაფრთხილება, რომლის გაუთვალისწინებლობის შემთხვევაში, მოგვიწევს სათანადო უწყებებისთვის მიმართვა, რათა გამოიძიონ და რეაგირება მოახდინონ მსგავს ფინანსურ სქემებზე.

მიუხედავად იმისა, რომ გათანაბრებული ტარიფების ინიაციატივა არაერთხელ გახდა განსჯის საგანი, მსურს ხაზგასმით აღვნიშნო, რომ მსგავსი არაპოპულარული ნაბიჯები დიდი რეფორმების ნაწილია, რომელშიც კეთილსინდისიერად, პასუხისმგებლობით ჩართულობა ყველას ვალდებულებაა.

აქვე დავამატებ, რომ ჯანდაცვის სამინისტროსთვის უმთავრესი პრიორიტეტია ხალხის ბიუჯეტის მაქსიმალურად მიზნობრივად და კეთილსინდისიერად გამოყენება. სწორედ ამიტომ, ჩვენ ვახორციელებთ შესყიდვების პროცესის მუდმივ აუდიტს, რათა გამოვავლინოთ ხარვეზები და კორუფციის თუნდაც მინიმალური რისკი თუ ცდუნება“-განაცხადა ეკატერინე ტიკარაძემ.

იხილეთ ასევე

საქართველოში კორონავირუსის გავრცელების დადებითობის მაჩვენებელი 8%-ს ასცდა

საქართველოში კორონავირუსის გავრცელების დადებითობის მაჩვენებელი 8%-ს ასცდა. stopcov.ge-ს ინფორმაციით, ბოლო 24 საათში 9790 ტესტიდან ვირუსი …