მთავარი » ფარმაცევტული ბაზარი » რეგულირების სააგენტო: თბილისში მოქმედი 40 ფარმაცევტული საწარმოდან 33-ში დარღვევები აღმოჩნდა

რეგულირების სააგენტო: თბილისში მოქმედი 40 ფარმაცევტული საწარმოდან 33-ში დარღვევები აღმოჩნდა

რეგულირების სააგენტომ თბილისში მოქმედი 40 ფარმაცევტული საწარმო შეამოწმა და 33-ში დარღვევები აღმოაჩინა. ინფორმაციას შემოწმების ამსახველ ფოტომასალასთან ერთად თავად სააგენტო ავრცელებს.

 

სააგენტოს ინფორმაციით, 33-ივე საწარმოში დარღვეული იყო სანებართვო პირობები, 22 შემთხვევაში კი  ფარმაცევტული პროდუქტი წარმოების წესის დარღვევით იყო ნაწარმოები.

„შემოწმების შედეგად აღმოვაჩინეთ სხვადასხვა ტიპის დარღვევები, როგორიცაა სანებართვო პირობების დარღვევა, წარმოების წესის დარღვევა. მაგალითად, ერთ-ერთი საწარმოს შემოწმებისას, სააგენტომ ვადაგასული ფარმაცევტული პროდუქტის  რეალიზაციის ფაქტები გამოავლინა და კონკრეტულად აღნიშნულ დაწესებულებას  7 დასახელების, 99 239 ერთეული, წარმოების წესის დარღვევით არსებული ფარმაცევტული პროდუქტი ჩამოერთვა“, – აღნიშნავს რეგულირების სააგენტოს ხელმძღვანელი, ზაალ კაპანაძე.

მისივე ინფორმაციით, შემოწმების შედეგად გამოიკვეთა: სანებართვო პირობების დარღვევის 33 ფაქტი; წარმოების წესის დარღვევის 22 შემთხვევა; სამკურნალო საშუალების სერიული აღრიცხვის დადგენილი წესის დარღვევის 4 ფაქტი; საქართველოს ბაზარზე დაშვების უფლების არმქონე ფარმაცევტული პროდუქტის მიმოქცევის 1 ფაქტი; პირველ ჯგუფისთვის მიკუთვნებული ფარმაცევტული პროდუქტის რეალიზაციის წესის დარღვევის 1 ფაქტი; ვადაგასული სამკურნალო საშუალების რეალიზაციის 1 ფაქტი; ვადაგასული ფარმაცევტული პროდუქტის განადგურების დადგენილი წესის დარღვევის 1 ფაქტი.

ზაალ კაპანაძე განმარტავს, რომ რეგულირების სააგენტო მუდმივად ახდენს ფარმაცევტული საწარმოებისა და აფთიაქების მონიტორინგს.  „ჩვენი პრიორიტეტია მოსახლეობას მიეწოდოს ხარისხიანი მედიკამენტები და ამ მიზნის მისაღწევად არაერთ ღონისძიებას ვატარებთ. მომდევნო წლიდან ძალაში შედის GMP ანუ კარგი საწარმოო პრაქტიკის და GDP ანუ კარგი სადისტრიბუციო პრაქტიკის სტანდარტის დაკმაყოფილების მოთხოვნა, რაც ქართულ ბაზარზე მედიკამენტების ხარისხს მკვეთრად გააუმჯობესებს.“

შეგახსენებთ, რომ GMP/GDP სტანდარტების დაკმაყოფილება სავალდებულო 2022 წლის პირველი იანვრიდან ხდება. კარგი საწარმოო პრაქტიკის (GDP) მიზანია უზრუნველყოს, რომ ფარმაცევტული პროდუქცია, რომელიც პირდაპირ ეხება ადამიანთა ჯანმრთელობას, მზადდებოდეს საიმედო გარემოში და პირობებში, კარგი დისტრიბუციის პრაქტიკა (GDP) კი გულისხმობს, რომ პროდუქცია ინახება და ხდება მისი ტრანსპორტირება ისე, რომ დაცულია ფარმაცევტული პროდუქტის ინსტრუქციით გათვალისწინებული გარემო პირობები სტანდარტებთან შესაბამისად.

GMP საერთაშორისო სტანდარტზე გადასვლა 2016 წლიდან იგეგმებოდა, თუმცა, როგორც მარეგულირებელი ორგანო განმარტავს, სისტემის დანერგვა, ფარმაცევტული დაწესებულებების თხოვნითა და მათთვის მოსამზადებელი პერიოდის გახანგრძლივების მიზნით ჯერ 2018 წლის პირველ იანვრამდე გადაიდო, მოგვიანებით კი, 2019 წლის პირველი ივლისიდან 2022 წლის პირველ იანვრამდე გარდამავალი პერიოდი განისაზღვრა. თავად ფარმაცევტული კომპანიები კი აცხადებენ, რომ გარკვეული ვალდებულებები – მათ შორის წამლის შესახებ ახალი კანონის მიღება – თავად სახელმწიფომ არ შეასრულა.

 

იხილეთ ასევე

საქართველო უახლოეს დღეებში COVID19-ის საწინააღმდეგო ორ უახლეს პრეპარატს ელოდება

საქართველო COVID19-ის საწინააღმდეგო ორ უახლეს პრეპარატს ამ კვირის განმავლობაში და ოქტომბრის მეორე ნახევარში მიიღებს. ინფექციური …