მთავარი » ჯანდაცვა » მოსახლეობის ჯანმრთელობა » ქვეყანას უნაყოფობის მკურნალობის თანადაფინანსების ცენტრალიზებული პროგრამა არ აქვს

ქვეყანას უნაყოფობის მკურნალობის თანადაფინანსების ცენტრალიზებული პროგრამა არ აქვს

უშვილო წყვილების რაოდენობის ზრდამ ქვეყანაში არსებული რთული დემოგრაფიული ფონი კიდევ უფრო დაამძიმა. დამხმარე რეპროდუქციული საშუალებების გამოყენება კი ძალიან დიდ ფინანსურ ხარჯებთან არის დაკავშირებული. გარდა ამისა, რეპროდუქციის სფეროში საკანონმდებლო რეგულაციები ზოგადი და ბუნდოვანია, რაც არასწორი ინტერპრეტირების საშუალებას იძლევა. ამის შესახებ ასოციაცია „ერთად ახალი სიცოცხლისთვის“ აცხადებს.

მათი თქმით, უნაყოფობის მკურნალობის დროს  ფინანსური ტვირთი იმდენად მძიმეა, რომ პაციენტების უმრავლესობა პრობლემის მოგვარებას მთელი თავისი ფინანსური რესურსის მობილიზებითაც ვერ ახერხებს.

„ჩვენი ასოციაციის მიზანია უნაყოფობის მკურნალობის ხელმისაწვდომობის გაზრდა და სახელმწიფოსთან პარტნიორობით მკურნალობის თანადაფინანსების პროგრამის შემუშავებისკენ კიდევ უფრო აქტიური ნაბიჯების გადადგმა. თავისთავად ცხადია ეს პროცესი ხანგრძლივია, საჭიროებს შესაბამის მარეგულირებელ საკანონმდებლო ჩარჩოს, რათა პაციენტების უფლებები და ინტერესები იყოს დაცული, ეს კი შესაძლებელია მხოლოდ სფეროს როგორც ადგილობრივი, ისე საერთაშორისო ექსპერტების თანამონაწილეობით.“ – აცხადებს ასოციაცია „ერთად ახალი სიცოცხლისათვის“ თანადამფუძნებელი და დირექტორი თამარ ქაჩლიშვილი.

თამარ ქაჩლიშვილი ამბობს, რომ ჯანდაცვის სამინისტროს წარმომადგენლებთან კონსულტაციების შემდეგ მისთვის ცხადი გახდა, რომ სახელმწიფოს კარგად ესმის საკითხის მნიშვნელობა და გარკვეული ღონისძიებები რეპროდუქციული მედიცინის რეგულაციის მიზნით უკვე დაწყებულია. აქვე ასოციაცია მიიჩნევს, რომ არასწორი მოლოდინების შექმნა ნაადრევია და  ისეთ ღარიბ ქვეყანას, როგორიც საქართველოა, ვერ მოვთხოვთ უახლოეს მომავალში სრულად გაიზიაროს ფინანსური ტვირთი. ამის მიუხედავად,  „ერთად ახალი სიცოცხლისთვის“ თვლის, რომ საკითხზე მუშაობის დაწყება აუცილებელია.

თანადაფინანსების პროგრამის შექმნა კომპლექსური პროცესია, რომელსაც შესაბამისი საკანონმდებლო რეგულაციები ესაჭიროება, ქართულ ენაზე შესამუშავებელია სათანადო პროტოკოლები, რაც გარკვეულ დროს მოითხოვს. აღსანიშნავია, რომ ასოციაციის და სფეროს ექსპერტების მხარდაჭერით, დღეს აჭარის ჯანდაცვის უწყებას უკვე აქვს თანადაფინანსების კომპონენტი უნაყოფობის პრობლემის მქონე პაციენტებისთვის.

იქედან გამომდინარე, რომ ქართულ ენაზე რეპროდუქციული მკურნალობის შესახებ საკმაოდ მწირი ინფორმაციაა, „ერთად ახალი სიცოცხლისთვის“ ინიციატივით, პაციენტებისთვის შეიქმნა გზამკვლევი, რომელშიც პირველად ქართულ ენაზე მოთხრობილია  დეტალური აღწერა უნაყოფობის მკურნალობის ეტაპების შესახებ.

დარგის სპეციალისტები და იურისტები რეპროდუქციის სფეროში არსებული სირთულეების მოსაგვარებლად მუშაობის დაწყების აუცილებლობაზე საუბრობენ. მოუწესრიგებელი საკანონმდებლო სივრცე და ბუნდოვანი რეგულაციები პაციენტებთან ერთად ექიმებსაც პრობლემებს უქმნის.

„საქართველოს რეპროდუქტოლოგთა და ემბრიოლოგთა ასოციაციამ“ უკვე დავიწყეთ ამ მიმართულებით გაიდლაინების მომზადება. ვმუშაობთ საკანონმდებლო რეგულაციების მიმართულებით, დადგინდა დამხმარე სამედიცინო ტექნოლოგიების, როგორც მაღალი რისკის შემცველი სამედიცინო ტექნოლოგიების, როგორც მაღალი რისკის შემცველი სამედიცინო საქმიანობის, ტექნიკური რეგლამენტი და მასზე შერჩევითი კონტროლის განხორციელება. ვგეგმავთ ჯანდაცვის სამინისტროსთან მჭიდრო კავშირით უფრო სწრაფ დროში გავხადოთ ეს სფერო რეგულირებადი, გამჭვირვალე სივრცე, რაც დაეხმარება პაციენტებს უკეთესი სერვისის მიღებაში“ – განაცხადა ჯანდაცვის ექსპერტმა რეპროდუქციულ მედიცინაში, პროფესორმა ნატო ხონელიძემ.

ორგანიზაცია „ერთად ახალი სიცოცხლისთვის“ 2021 წლის იანვარში შეიქმნა და მასში უნაყოფობის პრობლემის მქონე პაციენტები არიან გაერთიანებული. 2021 წლის დასაწყისში საინიციატივო ჯგუფმა  პეტიცია შეიმუშავა, სადაც 10 000 – ზე მეტმა ადამიანმა დააფიქსირა თანადაფინანსების პროგრამის შექმნის სურვილი. შედგა შეხვედრები როგორც პარლამენტის ჯანმრთელობის დაცვისა და სოციალურ საკითხთა კომიტეტის, ისე ჯანდაცვის სამინისტროს ოფიციალურ პირებთან.

მოგვიანებით საინიციატივო ჯგუფი „ერთად ახალი სიცოცხლისთვის“ ასოციაციად ჩამოყალიბდა და პაციენტების საერთაშორისო ორგანიზაცია „Fertility Europe“-ს შეუერთდა. „Fertility Europe“ ქოლგა ორგანიზაციაა, რომელიც 26 ქვეყნის უნაყოფობის პრობლემის მქონე პაციენტთა ასოციაციებს აერთიანებს.

 

jandacva.ge

 

იხილეთ ასევე

ალერგიის სეზონი სრულდება – რატომ უგრძელდება ადამიანების ნაწილს ალერგიის სიმპტომები?

მაღალი ალერგენული თვისებების სარეველა მცენარეების ყვავილობა დასასრულს უახლოვდება. ინფორმაციას ალერგიისა და იმუნოლოგიის ცენტრი ავრცელებს. ამასთან, …