ჯანდაცვის სამინისტროს რეგულირების სააგენტომ, GMP სტანდარტით იმ უცხოური საწარმოების შემოწმება დაიწყო, რომელთა მედიკამენტებიც, საქართველოში, იმპორტით შემოდის.
ინფორმაციას რეგულირების სააგენტო ავრცელებს.
უწყების ცნობით, აღნიშნულის მიზანი ქვეყანაში, მედიკამენტების ხარისხის კონტროლი და მაღალი ხარისხის წამლის მიმოქცევის უზრუნველყოფაა.
პროექტის ფარგლებში, პირველი, ბანგლადეშში მდებარე, ის რამდენიმე საწარმო შემოწმდა, საიდანაც საქართველოს ბაზარზე, 35 დასახელების სხვადასხვა მედიკამენტი შემოდის. ინსპექტირების ფარგლებში, სამედიცინო და ფარმაცევტული საქმიანობის რეგულირების სააგენტოს წარმომადგენლები ბანგლადეშში მდებარე Drug International Limited-ის სამ საწარმოში იმყოფებოდნენ. ადგილზე დეტალურად შემოწმდა წარმოების პროცესი, შენობა-ნაგებობები, დანადგარები, საწარმოო და ხარისხის კონტროლის ოპერაციები, მასალების მართვა და ყველა ის პროცედურა, რაც აუცილებელია საქართველოში მოქმედი GMP სტანდარტის დასაკმაყოფილებლად.
სააგენტოს მონაცემებით, ინსპექტირებისას აღმოჩენილი შეუსაბამობების აღმოსაფხვრელად, განისაზღვრება გონივრული ვადა, მომდევნო ნაბიჯებს კი, რეგულირების სააგენტო, განმეორებითი ინსპექტირების შედეგების მიხედვით განახორციელებს. რეგულირების სააგენტო, ბანგლადეშის შემდეგ, ინდოეთსა და უზბეკეთში მდებარე იმ საწარმოებს შეამოწმებს, რომელთა მედიკამენტებიც საქართველოში შემოდის. იმპორტირებული მედიკამენტების მწარმოებელთა ინსპექტირება დამკვიდრებული პრაქტიკაა თურქეთსა და ევროპაში, რომლებთანაც, საქართველო, ფარმაცევტულ სექტორში მიმდინარე რეფორმების ფარგლებში, აქტიურად თანამშრომლობს. აღსანიშნავია, რომ საქართველოს ეროვნული GMP სტანდარტი, რომლის მიხედვითაც საწარმოები მოწმდება, ევროკავშირის მიერ აღიარებული სტანდარტების შესაბამისია.
ჯანდაცვის სამინისტრო, ეტაპობრივად, ქვეყანაში იმპორტირებული წამლების ყველა მწარმოებელი კომპანიის ინსპექტირებას გეგმავს.
ფარმაცევტული პროდუქტის მწარმოებელი ადგილობრივი კომპანიებისთვის GMP სტანდარტი, ანუ კარგი საწარმოო პრაქტიკა, სავალდებულო, 2022 წლის იანვრიდან გახდა.
რეგულაციის ამოქმედების შემდეგ სფეროს ექსპერტების ნაწილი აცხადებდა, რომ აუცილებელია გარკვეულ ქვეყნებში არსებული იმ საწარმოების შემოწმება, საიდანაც საქართველო მედიკამენტების იმპორტს ახორციელებს.
jandacva.ge-სთან საუბარში საქართველოს ფარმაცევტთა ასოციაციის პრეზიდენტი ლევან გოგიბერიძე აცხადებდა, რომ გარკვეულ ქვეყნებში არის ისეთი საწარმოებიც, რომლებსაც მხოლოდ ეროვნული GMP-სტანდარტები აქვთ მიღებული, რაც ევროპასა და ამერიკაში არავალიდურია.
"ასეთ საწარმოებში ევროპელი ექსპერტები პირადად ჩადიან და ადგილზე ამოწმებენ, შეესაბამება თუ არა წარმოება საერთაშორისო სტანდარტებს. სწორედ მათ მიერ გაცემული დასკვნისა და სერტიფიკატის საფუძველზე იწყება ევროპის ამა თუ იმ ქვეყანაში აღნიშნული მედიკამენტის იმპორტი. საქართველოს კი არ აქვს იმდენი რესურსი, რომ ყველა შემთხვევაში ინსპექტორები მიავლინოს უცხოეთის ფარმაცევტულ საწარმოებში. ამიტომ ეს პრობლემა ამ მიმართულებით რჩება,“ - აცხადებდა გოგიბერიძე და ამ ფაქტორის გათვალისწინებით, საერთაშორისო სტანდარტებთან შეუსაბამო მედიკამენტების შემოსვლის რისკებზეე საუბრობდა.
