მსოფლიოს ბაზრებიდან ჩვილის რძის ფხვნილის გაწვევის პროცესმა უმსხვილესი კომპანიები სერიოზულად დააზარალა. სხვადასხვა მონაცემით, რიგ შემთხვევებში ზარალი ასობით მილიონ და მილიარდ დოლარამდეც კი ადის.
როგორც Reuters-ი წერს, Danone-ის აქციები ორშაბათს მკვეთრად დაეცა. ეს მას შემდეგ მოხდა, რაც ფრანგულმა კომპანია Vitagermine-მა გააფართოვა ბაზრიდან ამოსაღები პროდუქციის ჩამონათვალი, რომელიც შესაძლოა დაბინძურებული იყოს საშიში ნივთიერებებით. საუბარია „Babybio“-ს ჩვილის ფორმულის სამ კონკრეტულ პარტიაზე.
ჯერჯერობით ეს საფრთხე ოთხი მწარმოებლის შემთხვევაში გამოვლინდა და ჯამში 1 მილიარდ დოლარზე მეტი ზარალი გამოიწვია.
იმ კომპანიებს შორის, რომელთა რძის ფხვნილის პროდუქცია, შესაძლოა, ტოქსინ ცერულიდით იყოს დაბინძურებული, შედის მსოფლიოში რძის სამი უმსხვილესი მწარმოებელი: Nestlé, Danone და Lactalis.
Danone-ის აქციებით ვაჭრობა 2.3%-იანი კლებით დასრულდა. მანამდე კი ისინი 6%-ით გაუფასურდა, რაც 2025 წლის იანვრის შემდეგ ყველაზე დაბალი მაჩვენებელია.
შვეიცარიული ჯგუფის Nestle-ს აქციებმა დანაკარგების უმეტესი ნაწილი დაფარა და დილის ვაჭრობაში 3%-მდე დაეცა, რაც ხუთთვიანი მინიმუმის დონეა. აქციების ვარდნა ამ თვეში თითქმის 9%-ს შეადგენდა, მას შემდეგ, რაც პარტიები კომპანიამ ათობით ქვეყანაში გაიწვია.
ასეთი მასშტაბური გაწვევა ხაზს უსვამს, თუ როგორ შეიძლება ერთი საეჭვო ინგრედიენტი მკაცრად რეგულირებად ჩვილ ბავშვთა კვების მთელ სექტორზე გავრცელდეს, რაც მარეგულირებლების სწრაფ რეაგირებას და ბაზრის სწრაფ რყევას იწვევს. ცერულიდი, რომელსაც Bacillus cereus ბაქტერია წარმოქმნის და შეუძლია გულისრევა და ღებინება გამოიწვიოს, მომწოდებლისგან მოწოდებულ ინგრედიენტში აღმოჩნდა. ფრანგი გამომძიებლები იკვლევენ, არსებობს თუ არა კავშირი ორი ჩვილის გარდაცვალებასა და ბაზრიდან ამოღებულ პროდუქტებს შორის. საფრანგეთის სოფლის მეურნეობის სამინისტრომ განაცხადა, რომ პროდუქტი წარმოებულია ჩინეთში და გაიყიდა ჰოლანდიური კომპანიის მიერ, სახელწოდების დაკონკრეტების გარეშე.
Nestlé -მ შესაძლოა უფრო დიდი ფინანსური ზარალი განიცადოს - Barclays-ის შეფასებით, გამოწვევის შესაძლო ფინანსური ზეგავლენა Nestlé -სთვის შესაძლოა დაახლოებით 10-ჯერ მეტი იყოს, ვიდრე Danone-სთვის.
Barclays-ის თქმით, ყველაზე ცუდ სცენარში Danone-მა შეიძლება 100 მილიონი ევრო დაკარგოს, ხოლო Nestle-ს ზარალი შეიძლება 1 მილიარდ შვეიცარიულ ფრანკს (1,29 მილიარდი აშშ დოლარი) მიუახლოვდეს.
Bernstein-ის ანალიტიკოსების აზრით, ჩვილის ფორმულა Danone-ის ჯგუფის შემოსავლის დაახლოებით 21%-ს შეადგენს. Nestle-სთვის კი ეს კატეგორია, სავარაუდოდ, დაახლოებით 5%-ს შეადგენს.
სინგაპურის მარეგულირებლებმა „დანონის“ ჩვილის ფორმულის პარტიები დაბინძურების შესახებ შეშფოთების გამო დაბლოკეს. კომპანიამ პარასკევს რამდენიმე პარტიის ამოღების შესახებ განაცხადა და მიზეზად ირლანდიელი მარეგულირებლების განცხადება დაასახელა იმის შესახებ, რომ იქ წარმოებული პროდუქცია სხვა ევროპულ ქვეყნებში იქნა ექსპორტირებული.
