„ხშირ შემთხვევაში არის 35-40 პროცენტი სხვაობა ევროპის ქვეყნებთან“ - პრემიერი მედიკამენტების ფასებზე

„როდესაც საუბარია წამალზე და სამკურნალო საშუალებებზე, ბუნებრივია, ეს სასიცოცხლოდ მნიშვნელოვანი თემაა და სამართლიანია, რომ როგორც ხარისხის, ისე ფასის კუთხით იყოს ისეთი რეჟიმი, რომელიც მოქალაქეებისთვის ხელმისაწვდომობას უზრუნველყოფს“, – ამის შესახებ ჯანდაცვის მინისტრმა განაცხადა.მიხეილ სარჯველაძემ აღნიშნა, რომ მედიკამენტების დიდ ნაწილზე უკვე მოქმედებს რეფერენტული ფასწარმოქმნის მექანიზმი. დღეს გამართულ სამთავრობო საკოორდინაციო კომისიის სხდომაზე, სექტორის წარმომადგენლებთან ერთად, სწორედ აღნიშნული მექანიზმის ეფექტიანობაზე, ასევე ფასების რეგულირების სხვა პრეპარატებზეგავრცელების შესაძლებლობებზე იმსჯელეს.„ფაქტია, რომ რეფერენტული ფასები ამ დრომდე მუშაობს. ისე როგორც ბევრ განვითარებულ სახელმწიფოში, საქართველოშიც დანერგილია და მოიტანა დადებითი შედეგი. დაახლოებით 7000 დასახელების მედიკამენტებზერეფერენტული ფასი უკვე განსაზღვრულია და მოქმედებს. ეს ცოცხალი პროცესია. ფარმაცევტული სექტორის გამოხმაურება კონსტრუქციული და ნორმალური იყო. რა საკვირველია ყველას კარგად ესმის, რომ ერთ-ერთი უპირველესი მექანიზმი ფასების რეგულირებისთვის, სწორედ რეფერენტული პოლიტიკის გატარებაა. ამაზე იყო საუბარი და სექტორს აქვს განწყობა, რომ აღნიშნულმა მიდგომამ შეიძლება იმუშაოს სხვა მედიკამენტებთან მიმართებითაც“, - განაცხადა მიხეილ სარჯველაძემ.მინისტრმა ყურადღება გაამახვილა მედიკამენტების ხარისხის საკითხზეც და აღნიშნა, რომ ფასების რეგულირება ხარისხის კონტროლის გარეშე ვერ იქნება ეფექტიანი. მისი თქმით, სახელმწიფოსთვის პრიორიტეტულია, რომ ბაზარზე მოხვედრილი ნებისმიერი მედიკამენტი ხარისხობრივ სტანდარტებს აკმაყოფილებდეს.„ხარისხის კონტროლის მიმართულებით მნიშვნელოვანია მინიმალური სტანდარტების მკაცრად დაცვა – მედიკამენტი, რომელიც ამ სტანდარტს ვერ აკმაყოფილებს, ბაზარზე არ უნდა შემოდიოდეს, მიუხედავად იმისა,რამდენად მიმზიდველია ის ფასის თვალსაზრისით მეწარმისთვის, პაციენტისთვის თუ ექიმისთვის. ამ კუთხით, გასულ წელსაც მნიშვნელოვანი საკანონმდებლო ცვლილებები განხორციელდა, მათ შორის ე.წ. GMP სტანდარტების რეალურად ამოქმედება. აღნიშნულ საკითხებზე დღევანდელ სხდომაზეც იყო საუბარი“, – აღნიშნა მინისტრმა.მისივე თქმით, ხარისხისა და ფასის დაბალანსების შედეგი უკვე თვალსაჩინოა კონკრეტულ მაგალითებში.„როდესაც ვსაუბრობთ ხარისხსა და ფასზე, მაგალითად, ფსიქოტროპული მედიკამენტების რეგულირების შემდეგ, ზოგ შემთხვევაში ფასი 12-ჯერ, ზოგ შემთხვევაში კი 8-ჯერ შემცირდა. აქ საუბარია კონკრეტული მედიკამენტისფასზე და არა იმაზე, რომ ბაზარზე დაბალი ხარისხის, უფრო იაფი პროდუქტი გაჩნდა. საუბარია იმავე ხარისხის, იმავე პროდუქტის ფასის შემცირებაზე. შესაბამისად, საქმე გვაქვს ფასის კლებასთან უცვლელი ხარისხის პირობებში“, – განაცხადა მიხეილ სარჯველაძემ.

საუბარი იყო იმაზე თუ რა შეიძლება გაკეთდეს იმისთვის, რომ ადგილობრივი წარმოება წახალისდეს, რადგან ადგილობრივი წარმოება სტრატეგიული მიმართულებაა, -  ამის შემდეგ საერთაშორისო ფარმაცევტული კომპანიების წარმომადგენელთა ასოციაციის ხელმძღვანელმა  ირაკლი მარგველაშვილმა პრემიერთან შეხვედრის შემდეგ ჟურნალისტებთან განაცხადა.მისივე თქმით, აღნიშნულის გარდა შეხვედრაზე ყურადღება გამახვილდა იმაზე, რომ მნიშვნელოვანია სამართლიანი ფასის არსებობა, რათა აღნიშნულმა გავლენა არ მოახდინოს შესაძლო დეფიციტზე ან ხარისხის ვარიაციაზე."უნდა იყოს ხარისხიანი და ხელმისაწვდომი ფასი. ამ მიმართულებით, ყველა შევთანხმდით, რომ რეფერენტული ფასწარმოქმნის პროგრამა უნდა გაფორმდეს და გაფართოვდეს ძალიან ნელ-ნელა და ყურადღებით, რადგან გავიზიაროთ ის გამოცდილება, რომელიც გვქონდა წინა პერიოდში, რათა თავიდან ავირიდოთ ნებისმიერ შესაძლო დეფიციტი. სწორად წარმართული რეფერენტული ფასწარმოქმნა დეფიციტს არ წარმოშობს.ასევე, საუბარი იყო სხვადასხვა ტიპის მექანიზმების განვითარებაზე. მაგალითად, ბოლო პერიოდში არის შემთხვევები, როდესაც სახელმწიფო პირდაპირ ყიდულობს ზოგიერთ ძვირადღირებულ მედიკამენტს მძიმე ქრონიკული დაავადებებისთვის და ესეც მექანიზმია ფასების დაწევის. საბოლოო ჯამში, მექანიზმები არსებობს", - აცხადებს ირაკლი მარგველაშვილი.შეგახსენებთ, რომ პრემიერმა 2025 წლის ბოლოს განაცხადა, რომ სასურსათო პროდუქტებზე ქართულ და ევროპულ ფასებს შორის სხვაობა მართლაც დიდია.მთავრობის მეთაურის თქმით, ფასებს შორის სხვაობას განაპირობებს სადისტრიბუციო კომპანიებისა და მარკეტების მაღალი ფასნამატი, რომელიც საქართველოს საზღვრიდან დახლამდე საშუალოდ 86%-ს შეადგენს. პრემიერმა აღნიშნა, რომ მოგების მაღალი მარჟის პირობებში, კომპანიები მარკეტების ქსელს სწრაფად აფართოებენ.მისივე თქმით, წინასწარი ანალიზის საფუძველზე, შეიძლება გამოიკვეთოს რამდენიმე ძირითადი ფაქტორი, რომელიც მაღალ ფასნამატს და შესაბამისად, მაღალ ფასებს განაპირობებს. მათ შორის, არსებული პრაქტიკა აჩენს ეჭვს, რომ ბაზრის მოთამაშეები შესაძლოა, შეთანხმებულად, კარტელური პრინციპით მოქმედებდნენ.ასევე მნიშვნელოვანია აღინიშნოს, რომ პროდუქციის ფასებთან დაკავშირებით  შექმნილია სამთავრობო საკოორდინაციო კომისია,  რომელსაც  პრემიერ-მინისტრი ირაკლი კობახიძე ხელმძღვანელობს.  პირველი სხდომა 20 იანვარს გამართა. 21 იანვარს კი,  კომისიის წარმომადგენლები პროდუქტის მაღალ ფასებთან დაკავშირებით სუპერმარკეტების წარმომადგენლებს შეხვდნენ. 22 იანვარს სახელმწიფო უსაფრთხოების სამსახური და ფინანსთა სამინისტროს საგამოძიებო სამსახური რამდენიმე ათეულ სადისტრიბუციო და სასურსათო პროდუქტის რეალიზაციის ქსელში შევიდნენ და დოკუმენტაცია მოითხოვეს. 23 იანვარს "ფასების სამთავრობო კომისიამ"  შეხვედრა დისტრიბუტორებთან გამართა.

მედიკამენტებზე ფასების შემცირების მიზნით შეიქმნება საკოორდინაციო საბჭო,  ჯანდაცვის სამინისტრო კი ყველაფერს აკეთებს იმისთვის, რომ მედიკამენტების ფასი რაც შეიძლება ხელმისავწდომი იყოს მოსახლეობისთვის.ამის შესახებ “ავერსის” დამფუძნებელმა პაატა კურტანიძემ პრემიერთან შეხვედრის შემდეგ ჟურნალისტებთან, ფასების შემცირების შესახებ დასმულ შეკითხვაზე პასუხისას განაცხადა.„შეხვედრა იყო საინტერესო და ნაყოფიერი. პრემიერმა და მინისტრებმა, მთავრობის და კომისიის წევრებმა მოგვისმინეს ძალიან ყურადღებით, ჩაინიშნეს ძალიან ბევრი საკითხი. რაც გაჟღერდა ხელისუფლების მხრიდან,  არის ის, რომ ჩვენ წარვადგინოთ ყველა წინადადება, რომელიც ხელს შეუწყობს მედიკამენტების გაიაფებას. ბიზნესს აქვს ოქროს კანონი, რასაც პირადად მე ვიყენებ, რაც ბიზნესში ვარ 34 წელი - რაც უფრო იაფად და ნაკლები ფასნამატით ყიდი პროდუქციას, მით უფრო მეტს ყიდი და მით უფრო მეტი გაქვს მოგება. რაც უფრო ძვირად და მეტი ფასნამატით ყიდი, მით უფრო ნაკლებს ყიდი და ნაკლები გაქვს მოგება და ბოლოს საერთოდ კოტრდები. ანუ ჩვენი, ბიზნესმენების ბუნებრივი ინტერესია, რაც შეიძლება ნაკლები ფასნამატით და იაფად გავყიდოთ მედიკამენტები, რომ მოსახლეობამ შეძლოს მისი შეძენა,“ - აღნიშნა პაატა კურტანიძემ. მისივე თქმით, საკოორდინაციო საბჭოში, რომელიც მედიკამენტების ფასების საკითხზე შეიქმნება, მონაწილეობას მიიღებს არა მხოლოდ ჯანდაცვის, არამედ სხვა სამინისტროები, რადგან თემა უკავშირდება წარმოებასაც. მისივე ინფორმაციით, სექტორი წარადგენს წინადადებებს, რა შეიძლება გაკეთდეს ხელისუფლებისა და თავად ინდუსტრიის მხრიდან, რათა მედიკამენტები უფრო ხელმისაწვდომი იყოს მოსახლეობისთვის.„კმაყოფილი ვარ, რომ ხელისუფლებამ გამოთქვა მზადყოფნა, რომ ეს წინადადებები რეალურად განხორციელდეს. ფასების კლების სივრცე არის ის, რომ მაგალითად წინა მინისტრმა მიიღო დადგენლება, რომლის მიხედვითაც საქართველოში რეგისტრაცია არის უმკაცრესი მსოფლიოში, ამიტომ ბევრი წარმოების წამალი, რომლებსაც აქვს შედარებით დაბალი ფასი, უახლოეს ხანებში, როცა ეს დადგენილება შედის ძალაში, აღარ იქნება ქვეყანაში და მოსახლეობას მოუწევს ძვირადღირებული ანალოგის ყიდვა. გაუქმდება თუ გადახედვა მოხდება, ამაზე მთავრობის მხრიდან მივიღეთ პასუხი, რომ აღნიშნულის განხილვა მოხდება. ასეთი სივრცეები ნაყოფიერი მუშაობის პირობებში ძალიან ბევრი გამოიკვეთება,“ - განაცხადა პაატა კურტანიძემ. მისივე თქმით, ამჟამად  საქართველოში ბრუნვაშია 10 ათასი მედიკამენტი, მათგან 7 ათასი რეფერენტულ ფასს დაქვემდებარებულია და დარჩენილ 3 ათასსაც სამინისტრო ამ სიას თანდათან ამატებს.„7 ათასი პოზიციიდან 20%-ზე მეტს ფარმაცევტული კომპანიები, კონკურენციიდან გამომდინარე, უფრო იაფად ვყიდით, ვიდრე რეფერენტული ფასებია. ასე რომ, რეფერენტული ფასები ერთია, მაგრამ კონკურენცია ფარმაცევტულ სექტორში უმწვავესია,“ - განაცხადა „ავერსის“ დამფუძნებელმა.ფასებთან დაკავშირებით პრემიერ-მინისტრ ირაკლი კობახიძის ხელმძღვანელობით მოქმედმა სამთავრობო საკოორდინაციო კომისიამ ფარმაცევტულ სექტორთან შეხვედრა დღეს გამართა.