სკრინინგის პროგრამაში თანამედროვე მოდელი ამოქმედდა.
საშვილოსნოს ყელის კიბოს სკრინინგის მოდელი პაპ-ტესტირებიდან hr-HPV დნმ ტესტირებაზე გადავიდა. სკრინინგის ეროვნული ცენტრის მონაცემებით, HPV ტესტს აქვს უფრო მაღალი მგრძნობელობა, რაც დაავადების ადრეულ ეტაპზე გამოვლენის საშუალებას იძლევა.
25-დან 29 წლის ჩათვლით ისევ ტარდება ციტოლოგიური კვლევა ( პაპ-ტესტი), ხოლო 30-დან 60 წლის ჩათვლით Hr-HPV დნმ ტესტი.
საქართველო აღმოსავლეთ ევროპისა და შუა აზიის რეგიონში პირველი ქვეყანა გახდა, სადაც საშვილოსნოს ყელის კიბოს სკრინინგი აღნიშნული, ე.წ. PCR მოდელით მოხდება. კვლევა არა პაპ ტესტის, არამედ HPV ანუ ადამიანის პაპილომა ვირუსის გენომის გამოკვლევით ტარდება. ახალი ტესტი მაღალი მგრძნობელობით გამოირჩევა და დაავადების კიდევ უფრო ადრეულ ეტაპზე გამოვლენას უწყობს ხელს.
აღნიშნული ტესტები ხასიათდება უფრო მაღალი მგრძნობელობით და ეს მოდელი უზრუნველყოფს კიბოსა და კიბოსწინარე დაავადებების ადრეულ ეტაპზე გამოვლენას, რაც დროული და ეფექტიანი მკურნალობის და ქალის ჯანმრთელი და ხარისხიანი ცხოვრების გარანტიაა.
სპეციალისტები საუბრობენ იმაზეც, რომ ამერიკის შეერთებულ შტატებსა და მსოფლიოს სხვა არაერთ ქვეყანაში ეს მეთოდი უკვე დანერგილია, საქართველო კი რეგიონში პირველია, ვინც ამ მიმართულებით ნერგავს სიახლეებს.
მათი განმარტებით, ამ ცვლილების შედეგად მოლოდინია, რომ, ტესტის მაღალი მგრძნობელობიდან გამომდინარე, იმაზე მეტი დაავადებული გამოვლინდება, ვიდრე აქამდე, ციტოლოგიური კვლევით ხდებოდა.
როგორც ძველი მოდელის შემთხვევაში, ახლაც ბიოლოგიურ მასალას გამოიკვლევენ, თუმცა კვლევა ახალი მეთოდით ჩატარდება. ამ სამედიცინო სერვისის მიღებას 30-დან 60 წლამდე ქალები უფასოდ შეძლებენ. მანამდე კი კვლევა ციტოლოგიური ტესტით ჩატარდება.
ეროვნული სკრინინგ ცენტრი რამდენიმე უფასო პროგრამას ახორციელებს. მათ შორის არის ძუძუს და საშვილოსნოს ყელის კიბოს სკრინინგები. სხვადასხვა ტიპის საინფორმაციო კამპანიების მიუხედავად, პაციენტთა მოცვის მაჩვენებელი ქვეყანაში ამ დრომდე დაბალია და თბილისში ის 24 პროცენტს არ აღემატება. საერთაშორისო რეკომენდაციებით კი, დაავადების პრევენციისთვის პროგრამაში მოქალაქეების ჩართულობა 60-70 პროცენტს უნდა აღწევდეს.