საახალწლო დღეებში ალკოჰოლის მოხმარება მასობრივ ხასიათს იღებს. ამიტომაც ამ პერიოდში განსაკუთრებით აქტუალური ხდება საკითხი იმის შესახებ, რა ოდენობის ალკოჰოლი ითვლება ადამიანის ჯანმრთელობისთვის უსაფრთხოდ.
ჯანმრთელობის მსოფლიო ორგანიზაციის (WHO) მონაცემებით, ალკოჰოლის მოხმარების უსაფრთხო დონე არ არსებობს. ორგანიზაცია ალკოჰოლს პირველი ჯგუფის კანცეროგენად აფასებს და მას აზბესტთან, რადიაციასთან და თამბაქოსთან ერთად ყველაზე მაღალი რისკის ჯგუფში ათავსებს.
WHO-ს მონაცემებით, მსოფლიოში კიბოთი გამოწვეული სიკვდილიანობის წამყვანი მიზეზია. 2023 წლის მონაცემებით, ეკონომიკური თანამშრომლობისა და განვითარების ორგანიზაციის (OECD) ქვეყნებში ალკოჰოლის საშუალო წლიური მოხმარება ერთ სულ მოსახლეზე 8.5 ლიტრი სუფთა სპირტი იყო.
ლატვიაში, პორტუგალიასა და რუმინეთში ეს რაოდენობა 11.5 ლიტრს აჭარბებს, ხოლო ქვეყნების დაახლოებით მესამედში ერთ სულ მოსახლეზე მოხმარება 10 ლიტრი ან მეტია.
ჯანდაცვის პრევენციისა და ჯანმრთელობის ხელშეწყობის რეგიონალური დირექტორი ევროპაში, გუნდო ვაილერი, ამბობს: „ევროპას აღარ შეუძლია შეინარჩუნოს ილუზია, რომ ალკოჰოლის მოხმარება უვნებელია“.
თუმცა, ყველა ექსპერტი არ ეთანხმება ამ მოსაზრებას.
ამერიკის გულის ასოციაციის (AHA) მიერ გამოქვეყნებული უახლესი კვლევის თანახმად, ალკოჰოლის ზომიერი მოხმარება არ ზრდის გულის კორონარული დაავადების, ინსულტის ან გულის უკმარისობის რისკს. ის მიუთითებს, რომ ალკოჰოლის მცირე რაოდენობამ შეიძლება შეამციროს კიდევ გულის კორონარული დაავადების რისკი. თუმცა, ასოციაცია მაინც გვაფრთხილებს: „თუ ალკოჰოლს არ სვამთ, ნუ დაიწყებთ. თუ სვამთ, შეზღუდეთ მისი მიღება“. AHA ხაზს უსვამს, რომ მიუხედავად იმისა, რომ ზოგიერთი კვლევა ვარაუდობს, რომ ალკოჰოლის ზომიერმა მოხმარებამ შეიძლება შეამციროს გულ-სისხლძარღვთა დაავადებების რისკი, ყველა მტკიცებულება არ ადასტურებს ამ სარგებელს ზოგადი პოპულაციისთვის. „ზოგიერთი ადამიანისთვის, დღეში ერთ ან ორ ჭიქასაც კი შეუძლია არტერიული წნევის აწევა“, - აცხადებს AHA და ნათლად მიუთითებს იმასაც, რომ სამედიცინო მიზნებით ალკოჰოლის მოხმარება დაუშვებელია.
მართალია, ექსპერტები თანხმდებიან, რომ ალკოჰოლის ჭარბი მოხმარება ორგანიზმისთვის საზიანოა, თუმცა არ არსებობს კონსენსუსი იმის შესახებ, თუ რა რაოდენობა შეიძლება ჩაითვალოს „დაბალი რისკის“ შემცველად. ირლანდიაში, საზოგადოებრივი ჯანდაცვის სერვისების ადმინისტრაცია (HSE), თავის სახელმძღვანელო პრინციპებში აცხადებს, რომ ქალებმა კვირაში 11 სტანდარტულ სასმელზე მეტი არ უნდა მოიხმარონ, ხოლო მამაკაცებმა - არაუმეტეს 17-ზე. ორგანიზაცია სტანდარტულ ალკოჰოლურ სასმელად განსაზღვრავს 10 გრამ სუფთა სპირტის შემცველ სასმელს. HSE რეკომენდაციას უწევს ალკოჰოლის მოხმარების გადანაწილებას მთელი კვირის განმავლობაში, კვირაში მინიმუმ ორიდან სამ უალკოჰოლო დღეზე და ერთ ჯერზე მაქსიმუმ ექვსი სასმლის მიღებას. ესტონეთსა და პოლონეთში მამაკაცებისთვის ლიმიტი დღეში 40 გრამია, ხოლო ქალებისთვის - 20 გრამი. მეორეს მხრივ, ლატვია და ლიეტუვა რეკომენდაციას უწევენ ალკოჰოლის მოხმარების სრულ აკრძალვას.
