ელექტრონული კომერციის კანადური კომპანია Shopify, რომელიც მთელს მსოფლიოში მილიონობით ონლაინ მაღაზიას აერთიანებს, საკუთარ პლატფორმაზე ყველა ტიპის ვეიპის გაყიდვის აკრძალვას გეგმავს. აკრძალვა, სავარაუდოდ, უკვე მიმდინარე კვირიდან ამოქმედდება. გადაწყვეტილება მიღებული იქნა მას შემდეგ, რაც აშშ-ის შტატების სამართალდამცავი ორგანოები მასზე ზეწოლას ახდენდნენ, რათა უკანონო ელექტრონული სიგარეტების ონლაინ გაყიდვები შეეზღუდა.
Shopify მილიონობით ონლაინ მაღაზიას ემსახურება. სამართალდამცავები უკვე რამდენიმე წელია ითხოვენ, რომ კომპანიამ უფრო მკაცრად გააკონტროლოს მოვაჭრეები, რომლებიც ყიდიან ვეიპებს, რომლებსაც აშშ-ში კანონით აუცილებელი ნებართვები არ აქვთ ან სხვა წესებსაც არღვევენ.
უკანონო ვეიპების დიდი ნაწილი ჩინეთში იწარმოება. მიუხედავად იმისა, რომ მათი იმპორტი და გაყიდვა აშშ-ში აკრძალულია, ისინი კვლავ ფართოდ იყიდება როგორც ინტერნეტში, ისე ვეიპ-შოპებში, მინი-მარკეტებსა და ბენზინგასამართ სადგურებზე. Reuters-ის ცნობით, Shopify-ის მოსალოდნელი აკრძალვა შეიძლება გახდეს ყველაზე მნიშვნელოვანი გამარჯვება იმ სახელმწიფო ორგანოებისთვის, რომლებიც ცდილობენ ამ ინდუსტრიის შეზღუდვას საზოგადოებრივი ჯანმრთელობის დაცვის მიზნით.
Shopify-ის წარმომადგენელმა განაცხადა, რომ კომპანია ყოველთვის კრძალავდა უკანონო საქმიანობას და რეაგირებს მაშინ, როდესაც აღმოაჩენს, რომ რომელიმე მოვაჭრე მის წესებს არღვევს. თუმცა კომპანიამ არ დაადასტურა, რომ გადაწყვეტილება კონკრეტულად გენერალური პროკურორების ზეწოლით მიიღო.
Reuters-ის თანახმად, აშშ-ის უკანონო ვეიპების ბაზრის მოცულობა დაახლოებით 9 მილიარდ დოლარს აღწევს. თამბაქოს მსხვილი მწარმოებლები ამტკიცებენ, რომ სწორედ არალიცენზირებული პროდუქცია აზიანებს მათ კანონიერ ბიზნესს.
FDA-ის დღემდე მხოლოდ 45 ელექტრონული სიგარეტის პროდუქტი აქვს ოფიციალურად ავტორიზებული, უმეტესად თამბაქოს არომატით. ინდუსტრიის წარმომადგენლები მიიჩნევენ, რომ ასეთი მკაცრი რეგულაცია ხელს უწყობს შავი ბაზრის ზრდას.
სხვადასხვა წყაროს ინფორმაციით, Shopify-ის აკრძალვა აშშ-ში ყველა ვეიპს შეეხება — მათ შორის ისეთებსაც, რომლებსაც FDA-ის ავტორიზაცია აქვთ. თუმცა ლეგალური ვეიპების გაყიდვების შედარებით მცირე ნაწილი ხდება ინტერნეტით, მაშინ როცა უკანონო პროდუქციისთვის ონლაინ ვაჭრობა გაცილებით მნიშვნელოვანი არხია. ამიტომ ექსპერტები ვარაუდობენ, რომ ახალი პოლიტიკა ყველაზე მეტად არალეგალურ მოვაჭრეებზე აისახება.
ცალკე მიმართულებით, Mastercard-მა მაისში პარტნიორებს აცნობა, რომ არალიცენზირებული ვეიპების გაყიდვა კომპანიის სტანდარტებს არღვევს. კომპანიამ გააფრთხილა ფინანსური შუამავლები, რომ შესაძლოა დაიწყოს გამოძიებები და დააწესოს ჯარიმები, თუ მათი მომსახურება უკანონო ვეიპების რეალიზაციისთვის იქნება გამოყენებული.
Reuters-ის ინფორმაციით, Shopify-ის გადაწყვეტილება წარმოადგენს აშშ-ის ხელისუფლების უფრო ფართო კამპანიის ნაწილს, რომელიც მიზნად ისახავს უკანონო ვეიპების ბაზრის შეზღუდვას. თუ აკრძალვა სრულად ამოქმედდება, ის მნიშვნელოვნად გაართულებს ელექტრონული სიგარეტების ონლაინ გაყიდვას და შესაძლოა სერიოზული გავლენა მოახდინოს მრავალმილიარდიან არალეგალურ ინდუსტრიაზე.
