GMP სერტიფიკატი საქართველოში მეოთხე ფარმაცევტულმა მწარმოებელმა მოიპოვა. GMP, იგივე „კარგი საწარმოო პრაქტიკის“ სტანდარტი „ბიოქიმფარმმა“ დააკმაყოფილა და 15 სექტემბერს შესაბამისი სერტიფიკატიც მიიღო. მანამდე ეს სერტიფიკატი მიიღეს „ავერსი რაციონალმა “, „ჯი ემ ფარმასიუთიქალმა “ (PSP-ს საწარმო) და ანტიბიოტიკების მწარმოებელმა კომპანია „აბიფარმმა“.
როგორც „ბიოქიმფარმის“ მენეჯერმა რატი ღოლიჯაშვილმა jandacva.ge-სთან საუბარში განაცხადა, მათი საწარმო არის ფაგების პირველი ინდუსტრიული წარმოება მსოფლიოში, რომელსაც GMP სერტიფიკატი გააჩნია.
მისი თქმით, კომპანიას მიეცა უფლება, აწარმოოს ნებისმიერი, სტერილური, თხევადი ფორმის მედიკამენტი, მათ შორის ვაქცინები.
შეგახსენებთ, რომ GMP ვალდებულება საქართველოში მოქმედი ფარმაცევტული საწარმოებისთვის 2022 წლის იანვრიდან ამოქმედდა.
ესაა სტანდარტი, რომელიც ითვალისწინებს მაღალი ხარისხის, წარმოებისთვის უსაფრთხო შენობა-ნაგებობების, მიკრობიოლოგიური ლაბორატორიების, წყლის და ჰაერის ვენტილაციის სისტემის დანერგვას და სხვა მკაცრი მოთხოვნების დაკმაყოფილებას.
ასევე შეგახსენებთ, რომ ხვალიდან ქართულ ბაზარზე „ბიოქიმფარმის“ ცნობილი მედიკამენტი „ფაგიო“ ბრუნდება, რომელიც გამოიყენება ბაქტერიებით გამოწვეული ყელ-ყურ-ცხვირის, ზედა და ქვედა სასუნთქი გზების, კუჭ-ნაწლავის, ასევე უროგენიტალური ინფექციების მკურნალობისა და პრევენციის მიზნით.
თვეების განმავლობაში ბაზარზე პროდუქციის დეფიციტის მიზეზი საწარმოში განხორციელებული მოდერნიზაციის პროცესი იყო, რომლის მიზანიც საწარმოს ევროკავშირის GMP სტანდარტთან შესაბამისობაში მოყვანაა.
კომპანია აწარმოებს 15-მდე რეგისტრირებულ პროდუქტს, ავითარებს ვეტერინარული პროდუქტების მიმართულებასაც, რათა აღმოიფხვრას ანტიბიოტიკების არარაციონალური გამოყენება ფერმებში.
კომპანიის პროდუქცია 8 საექსპორტო ბაზარზე გადის და ახლო მომავალში 80 ქვეყანაში გასვლას გეგმავენ.
