მომსახურებისა და მედიკამენტების ნაკლებობა და საქართველოს ჯანდაცვის სისტემისადმი უნდობლობა - ესაა მხოლოდ ორი იმ რამდენიმე ფაქტორს შორის, რომლებიც საქართველოს მოქალაქეებს საზღვარგარეთ სამედიცინო დახმარების მოძიებისკენ უბიძგებს.
ამის შესახებ ნათქვამია კვლევაში, რომელსაც მიგრაციის საერთაშორისო ორგანიზაციის საქართველოს მისია ხელმძღვანელობდა და რომელიც ჯანდაცვის მსოფლიო ორგანიზაციასთან (WHO) და ჯანდაცვის სამინისტროსთან თანამშრომლობით, ასევე შვეიცარიის მიგრაციის სახელმწიფო სამდივნოს და ავსტრიის შინაგან საქმეთა სამინისტროს მხარდაჭერით ჩატარდა.
კვლევის შედეგებისა და ერთობლივი სამოქმედო გეგმის პრეზენტაცია მიგრაციის საერთაშორისო ორგანიზაციის მიერ, ‘Georgia Cares’ პროექტის ფარგლებში ორგანიზებულ სემინარზე გაიმართა. მას ესწრებოდნენ საქართველოს ჯანდაცვის სახელმწიფო ორგანოების წარმომადგენლები, საერთაშორისო პარტნიორები და დონორი ორგანიზაციები.
კვლევის შედეგებმა გამოავლინა, რომ სამედიცინო მიგრაციის ძირითადი მამოძრავებელი ფაქტორებია მომსახურებისა და მედიკამენტების ნაკლებობა, ხელმისაწვდომობის ბარიერები, რეგიონული უთანასწორობა და ეროვნული ჯანდაცვის სისტემისადმი უნდობლობა.
„აღნიშნული კვლევა და ერთობლივი სამოქმედო გეგმის შემუშავება მნიშვნელოვანი წინგადადგმული ნაბიჯია სამედიცინო მიგრაციის ძირითადი გამოწვევების საპასუხოდ. დონორების, სამინისტროსა და პარტნიორებს შორის უწყვეტი თანამშრომლობა გადამწყვეტია ერთობლივი სამოქმედო გეგმის წარმატებით განსახორციელებლად, რათა შეიქმნას საერთო ხედვა სამომავლო ნაბიჯების შესახებ“, - განაცხადა გენცი პიეტრიმ, IOM საქართველოს პროგრამის განვითარების ოფიცერმა.
სამინისტროს სტრატეგიული განვითარებისა და ანალიზის დეპარტამენტის უფროსმა, ლელა სულაბერიძემ, მადლობა გადაუხადა საერთაშორისო პარტნიორებს ყოვლისმომცველი კვლევის შემუშავებაში გაწეული წვლილისთვის. მან წარმოადგინა სამწლიანი სამთავრობო გეგმა, რომელიც მიზნად ისახავს ჯანდაცვის სისტემის გაუმჯობესებას და სამედიცინო მიგრაციის შემცირებას.
შვეიცარიამ კიდევ ერთხელ დაადასტურა თავისი მხარდაჭერა სისტემური რეფორმის მიმართ. ბარბარა ბონიმ, სამხრეთ კავკასიაში შვეიცარიის თანამშრომლობის ოფისის რეგიონულმა დირექტორმა, აღნიშნა: „საქართველოდან სამედიცინო მიგრაციის შემთხვევები შვეიცარიასა და ევროპის სხვა ქვეყნებში ბოლო წლებში მნიშვნელოვნად გაიზარდა, რაც მრავალმხრივ გამოწვევებს უქმნის ეროვნულ და ჯანდაცვის სისტემებს. სამედიცინო მიგრაციის მამოძრავებელი ფაქტორებთან გამკლავება კოლექტიურ მოქმედებას მოითხოვს და დღევანდელი სემინარი სწორედ ამ სულისკვეთებას ასახავს“.
ავსტრიის საელჩოს მისიის ხელმძღვანელის მოადგილემ და კონსულმა, ლენა კოპენშტაინერმა, აღნიშნა საქართველოს მოქალაქეების მხრიდან ჯანმრთელობის მიზეზებით თავშესაფრის მოთხოვნის მზარდი რაოდენობა: „ჯანმრთელობა და მიგრაცია ღრმად ურთიერთდაკავშირებული საკითხებია, რომლებიც საჭიროებენ გააზრებულ თანამშრომლობას. ავსტრიაში ქართველი თავშესაფრის მაძიებელთა დაახლოებით 50% მათი მოთხოვნების მთავარ მიზეზად ჯანმრთელობის მდგომარეობებს ასახელებს. ეს რეალობა ხაზს უსვამს სტრუქტურული და თანამშრომლობითი მიდგომების აუცილებლობას“.
მიგრაციის საერთაშორისო ორგანიზაციის ვებგვერდზე განთავსებული ინფორმაციის თანახმად, ერთობლივი სამოქმედო გეგმა მოიცავს კოორდინირებულ მიდგომას, კონკრეტული აქტივობებითა და განსაზღვრული ვადებით, რომლებიც მიზნად ისახავს სისტემური ხარვეზების მოგვარებას. კონკრეტული რეფორმები ფოკუსირებული იქნება მმართველობისა და პოლიტიკის კოორდინაციის გაძლიერებაზე, ჯანდაცვის სერვისების ხარისხისა და ხელმისაწვდომობის გაუმჯობესებაზე, ჯანდაცვის მონაცემთა ინფრასტრუქტურის განახლებასა და ძლიერი სამედიცინო პერსონალის ჩამოყალიბებაზე.
კონკრეტულად, რა მიგნებებია კვლევაში და რას ითვალისწინებს გეგმა - დეტალები არ გასაჯაროვებულა.
