საქართველოს პარლამენტის ჯანმრთელობის დაცვისა და სოციალურ საკითხთა კომიტეტმა პირველი მოსმენით განიხილა და მხარი დაუჭირა „საექიმო საქმიანობის შესახებ“ საქართველოს კანონში ცვლილებას.
მთავრობის საკანონმდებლო ინიციატივა სხდომაზე საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ, ირინა წაქაძემ წარადგინა.
კანონპროექტის თანახმად, უქმდება სახელმწიფო სასერტიფიკაციო გამოცდაზე განმეორებით გასვლის რაოდენობასა და გამოცდებს შორის 6-თვიანი ინტერვალის დაცვასთან დაკავშირებული საკანონმდებლო შეზღუდვა.
ცვლილების თანახმად, დაინტერესებულ პირს შესაძლებლობა მიეცემა, სახელმწიფო სასერტიფიკაციო გამოცდაზე უარყოფითი შეფასების მიღების შემდეგ, გამოცდის ჩატარების დადგენილი წესისა და განრიგის შესაბამისად, განმეორებით მიიღოს მონაწილეობა სახელმწიფო სასერტიფიკაციო გამოცდაში.
ირინა წაქაძის თქმით, ცვლილება შეფასების კრიტერიუმებს და საკვალიფიკაციო მოთხოვნებს არ ეხება და ამიტომ უსაფუძვლოა შიში, რომ ექიმების კვალიფიკაცია დღევანდელზე დაბალი იქნება, რაც პაციენტის უსაფრთხოების დაცვის ხარისხის შემცირებას გამოიწვევდა.
მისივე განმარტებით, პრინციპი, რომ გამოცდის წარმატებით ჩაბარების გარეშე პირი ვერ შევა პროფესიაში, ნარჩუნდება.
