რუსეთის ჯანდაცვის მარეგულირებელმა უწყებამ დღეს უარყო ინფორმაცია იმის შესახებ, რომ ციმბირში ჭირის კვლევით ლაბორატორიაში მომუშავე თანამშრომელთან კონტაქტის შემდეგ კიდევ ერთი ადამიანი დაავადდა და გარდაიცვალა.
უწყების განცხადებით, სოციალურ ქსელებში გავრცელებული ცნობები „დაავადების მეორე შემთხვევის“ შესახებ ყალბია. ხელისუფლება ამბობს, რომ გარდაცვლილი თანამშრომლის ყველა კონტაქტი შემოწმდა და ინფექციურ დაავადებასთან დაკავშირებული ჯანმრთელობის პრობლემები არც ერთ მათგანს არ აღმოაჩნდა. ასევე, თითქმის 5,000 ლაბორატორიული ტესტის შედეგად საშიში პათოგენური მიკროორგანიზმები არ გამოვლენილა.
საქმე ეხება 28 წლის დარია შიპილოვას, რომელიც ციმბირში ჭირის კვლევით ინსტიტუტში მუშაობდა და 2 ოქტომბერს გარდაიცვალა. რუსეთის ხელისუფლების განცხადებით, მისი გარდაცვალების მიზეზი პნევმონია იყო, თუმცა პნევმონიის გამომწვევი მიზეზი ჯერ დადგენილი არ არის. ამასთან, რუსეთს ოფიციალურად ჯერ არ დაუდასტურებია, რომ მისი დაავადება ჭირს უკავშირდებოდა.
რუსეთის ხელისუფლება აცხადებს, რომ ეპიდემიის გავრცელების საფრთხე არ არსებობს, თუმცა ქვეყნის პასუხმა საერთაშორისო შეშფოთება სრულად ვერ გააქრო.
ჯანმრთელობის მსოფლიო ორგანიზაციამ რუსეთს დამატებითი განმარტებები მოსთხოვა მას შემდეგ, რაც გავრცელდა ცნობები, თითქოს იმავე ინსტიტუტის კიდევ ერთ თანამშრომელს დაუდგენელი მიზეზით პნევმონია ჰქონდა. ჯანმოს ხელმძღვანელის თქმით, ორგანიზაციამ ეს ინფორმაცია ორი მედიასაშუალებიდან მიიღო — ერთ-ერთი რუსული გამოცემა იყო, მეორე კი ბრიტანული Daily Mail, რომელიც თავის მხრივ ანონიმურ რუსულ მედიას ეყრდნობოდა.
